:: Tepas  Sakolebat Gunung |
|
|
| Gunung Guntur |
|
Malati di Gunung Guntur
Seungitna sungkeman ati Bodas sesetraning rasa Pada di luhur téh sawaréh tina rumpaka lagu "Malati di Gunung Guntur" sanggiang Mang Koko (Koko Koswara) anu kungsi dipikaresep taun 1970-an. Rumpakana dikarang ku Wahyu Wibisana, pangarang Sunda moyan. Mun Gunung Guntur mineng jadi inspirasi pars seniman, memang teu anéh. Lian ti kaayaan alamna anu matak hélok, ogé loba kabéjakeunana. Tapi, sanajan ti kaanggangan mah matak waas, saéstuna Gunung Guntur téh kungsi sababaraha kali ngageunjleungkeun masarakat Garut. Nu pangahirna, taun 2003, Gunung Guntur kabéjakeun rék bitu deui sabada Gunung Papandayan nu jadi tatanggana nembongkeun aktivitas vulkanik. Memang, dina sajarahna Gunung Guntur nu pernahna di kaléreun kota Garut téh kacatet geus bitu sababaraha kali. Nepi ka ayeuna gunung nu luhurna 2.249 métér ti beungeut laut téh masih jadi gunung aktif. Najan kitu, tetep baé keur masarakat mah Gunung Guntur téh matak narik. Malah teu saeutik jalma nu ngahajakeun naék ka ponclotna sanajan saenyana mah pibahayaeun. Lian ti jalanna anu tarahal, di ponclot éta gunung téh taneuhna beueus jeung panas lantaran hawa magma. Tapi keur nu naraék mah sigana jadi kaahéngan anu pika bitaeun. Atuh lamun geus nepi ka ponclotna, pamandangan ka lebak téh pan sakitu matak hélokna. Dayeuh Garut ngampar lir alketip. |
