placeholder for flash movie
Senén, 26 Juni 2017   English | Indonesia
:: Tepas Sajarah Inohong


Anwar Musaddad

Ngaran Musaddadiyah téh geus teu bireuk di Garut mah. Boh keur kolot boh keur budak. Da kapan Musaddadiyah teh ngaran salah sahiji lembaga pendidikan di kota Garut anu kaitung gedé jeung dipika¬wanoh ku masarakat. Perenahna di Jaya-raga, Tarogong. Ngaran lengkepna Yaya¬san Pendidikan Al-Musaddadiyah Garut, anu muka lembaga pendidikan ti TK nepi ka Perguruan Tinggi.

Éta pasantrén téh diadegkeun ku An¬war Musaddad katut kulawargana. Nya saha ari Anwar Musaddad téh?
Anwar Musaddad téh keur leutikna mah nelah Dédé Masdiad. Lahir di Garut tanggal 3 April 1910. Umur opat taun geus yatim, sarta diasuh ku indung jeung ninina anu harita ngokolakeun usaha batik Garut jeung dodol Kuraétin.

Lantaran lain anak ménak, Dédé kudu sakola di HIS Kristen sarta nuluykeun ka MULO Kristen di Sukabumi. Waktu di Sukabumi Dédé sempet guguru agama Islam ka Ustad Sahroni. Tamar ti MULO Dédé nuluykeun ka AMS Kristen di Jakarta.

Karék dua taun di AMS, anjeunna dititah mulang ka Garut ku kulawargana lantaran kabéjakeun sering kaluar asup ka Garéja. Ku kulawargana anjeunna dipasantrénkeun ka Cipari anu harita dicepeng ku Kyai Harmaén. Nya harita Dédé  robah  ngaran jadi Anwar Musad¬dad. Anjeunna tuluy neuleuman basa Arab sarta pindah ka Jakarta. Waktu di Jakarta, anjeunna numpang di imah H.O.S. Cokroaminoto, salah saurang tokoh Sarékat Islam (SI).

Taun 1930, Anwar Musaddad miang ka Mekah ngajajapkeun indung jeung ninina munggah haji. Tapi anjeunna tuluy sakola di Madrasah Al-Falah, malah tuluy ngajar di dinya. Di Mekah anwar nikah ka Maskatul Millah, anak mukimin ti Ciparay. Anwar tuluy neuleuman bagbagan Islam ka sawatara séh jeung ulama jumhur di Masjidil Haram.

Taun 1941, Musaddad mulang ka Indonésia sarta getol ngayakeun tablég. Jaman Jepang anjeunna diangkat jadi Kepala Kantor Urusan Agama Priangan anu munggaran, sarta jadi Ketua Masyumi daérah Priangan. Jaman révolusi, Musaddad ngagabung jeung tentara Hisbullah sarta mingpin pasukan bareng jeung K. H. Yusuf'Tauziri, malah kungsi katéwak ku Walanda.

Sabada Indonésia merdeka, Anwar Musaddad ditugaskeun pikeun ngadegkeun Perguruan Tinggi Agama Islam Negeri (PTAIN) di Yogyakarta ku Menteri Agama. Sabada éta perguruan tinggi ngadeg Musaddad jadi dosén basa Arab jeung da'wah di dinya. Taun 1960, Musaddad ditugaskeun deui pikeun ngadegkeun jeung ngokolakeun IAIN di Bandung. Malah anjeunna jadi réktor IAIN Sunan Gunungjati Bandung anu munggaran dina taun 1968. Gédéngeun ti éta, anjeunna ditunjuk pamaréntah jadi anggota panitia pikeun narjamahkeun jeung nafsirkeun Qur'an dina basa Indonésia jeung Sunda. Lian ti éta, anjeunna ogé aktif di NU (Nandlatul Ulama).

Sabada pangsiun, Musaddad ngadegkeun lembaga pendidikan Al¬-Musaddadiyah di Garut, anu awalna ngan muka Fakultas Syari'ah. Tapi tuluy disusul ku muka SMA, SMP, Madrasah Tsanawiyah, Madrasah Aliyah, SMK, TK Al-Qur'an, jeung STTG (Sekolah Tinggi Teknologi Garut).

Anwar Musaddad ngantunkeun di Garut dina ping 21 Juli 2000, sarta dimakamkeun di komplék pasantrén Al-Musaddadiyah.

Pencét panah kiwa/katuhu dina Kibord sangkan pindah ka artikel séjén
Navigasi
June 2017
SuMoTuWeThFrSa
    123
45678910
11121314151617
18192021222324
252627282930 
No Activities.
Stats Situs
IP Address : 51.255.71.130
Tautan Pilihan
spacer