Pamaréntah Kabupatén Garut :: MENU: Sesebatan Waktos

:: Menu Utama

Ngamumulé Basa jeung Sastra

Sesebatan

Sesebatan Waktos

Waktos Sadinten Sawengi

Sesebatan	Hartosna
janari gedé	kira-kira tabuh 01.00-03.00
janari leutik	kira-kira tabuh 03.30-04.30
balébat	waktu fajar geus udat-udat belah wétan
carancang tihang	geus liwat pajar, waktu téténjoan masih remeng-remeng, kira-kira tabuh 05.00
haneut moyan	waktu keur ngenah-ngenahna dipaké moyan, kira-kira tabuh 07.00-08.30
rumangsang	panon poé geus karasa panas, kira-kira tabuh 09.00
pecat sawed	waktu munding anu dipaké ngawaluku sawah dilaan (dipecat) sawedna, kira-kira tabuh 10.00
manceran/mentarangan	waktu panon poé aya luhureun sirah, kira-kira tabuh 12.00
wanci lingsir ngulon	waktu panon poé geus mimiti ngagésér ka beulah kulon, kira-kira tabuh 13.00
wanci panon poé satantung	kira-kira tabuh 15.00
wanci tunggang gunung	waktu panon poé geus mimiti surup, dina luhureun gunung, kira-kira tabuh 16.00-17.00
sariak layung	waktu layung anu ciri-cirina cahaya panon poé di langit katénjo burahay beureum kira-kira tabuh 17.00-18.00
sareupna	waktu geus mimiti reup poék, kira-kira tabuh 18.30
wanci sareureuh budak	waktu barudak leutik geus carapéeun ulin jeung ngaji, kira-kira tabuh 20.00
tengah peuting (jemplang-jempling)	waktu tengah peuting, tabuh 24.00

Waktos Panujuk Solat/Puasa

Sesebatan	Hartosna
imsak	kira-kira 10 menit sateuacan waktu subuh
subuh	kira-kira tabuh 04.30
lohor	kira-kira tabuh 12.00
asar	kira-kira tabuh 15.30
magrib/buka	kira-kira tabuh 18.00
isa	kira-kira tabuh 19.00

Waktos Anu Sanésna

Sesebatan	Hartosna
sakilat/sajorélat	nuduhkeun waktu anu sakeudeung pisan, diupamakeun kana ngaburinyayna kilat di langit
sakedét nétra/sakiceup	dipaké nuduhkeun waktu anu sakeudeung pisan, sakumaha jelema anu ngiceup
sapanyeupahan	lilana kira-kira sarua jeung waktu anu dipaké keur nyeupah seureuh
sapangéjoan	lilana sarua jeung jelema nu keur nyangu
sapoé sapeuting	lilana 24 jam
saminggu	lilana 7 poé
sabulan	lilana 30 poé, 4 minggu
saumur jagong	salila melak jagong nepi ka panénna, kira-kira 3,5 bulan
sataun	lilana 356 poé, 52 minggu, 12 bulan
sataun landung	lilana sataun leuwih
sawindu	lilana 8 taun
saabad	lilana 100 taun
ayeuna	dipaké jang nyebutkeun waktu éta kénéh
kamari	nyebutkeun poé nu geus kaliwat sapoé
mangkukna	nyebutkeun poé saacan kamari
isukan	nyebutkeun sapoé nu bakal datang
pagéto	nyebutkeun sapoé sanggeus isukan
bieu	nyeubutkeun waktu nu cikénéh karandapan
baréto	nyebutkeun waktu nu rada lila kaliwat
baheula	baheula di paké jang nyebutkeun waktu béh ditueun baréto
eungké	nyebutkeun waktu nu sakeudeung deui bakal karandapan
jaga, isuk jaganing pagéto	nyebutkeun waktu nu bakal datang

Usum-usuman

Sesebatan	Hartosna
1.Patali jeung kakayaan masarakat
a. usum pagebug	usum loba nu gering parna, jeung loba nu maraot
b. usum sasalad	usum loba panyakit nu babari tépa
c. usum patepok	usum loba nu kawin
d. usum tigerat	usum paila, kurang dahareun, pangpangna kurang béas atawa paré
2. Patali jeung kakayaan alam
a. mamaréng	mimiti rék ngijih
b. usum ngijih	usum hujan, ngecrek saban poé
c. dangdangrat	usum hujan paselang jeung usum halodo, datangna hujan jeung halodo sifatna kakapeungan
d. usum katiga	usum teu ayana hujan
3. Patali jeung tatanén
a. usum nyambut	usum mimiti ngagarap sawah
b. usum tandur	usum melak binih paré
c . usum ngarambét/ngoyos	mangsa patani miceunan jukut sawah
d. usum celetu	mangsa paré culcel baruahan
e. usum beukah	mangsa paré geus loba nu buahan
f. usum rampak	mangsa paré geus rata
g. usum panén	mangsa panén paré
h. usum nyacar	usum nyacar leuweung pikeun sérang atawa pihumaeun
i. usum ngahuru	usum ngahuru, meuleum kai gararing nu meunang nyacar
j. usum ngaduruk	usum meresihan sarta ngadurukan kai nu can kabeuleum waktu ngahuru jeung meresihan lahan
k. usum ngaseuk	usum nyocok-nyocokeun kai nu meunang nyeukeutan tungtungna (aseuk) nu tapakna diasupan bibinihan
l. usum ngoréd	usum meresihan jukut nu jaradi antara pepelakan maké koréd
m. usum dibuat	usum panen