placeholder for flash movie
Jumaah, 24 Maret 2017   English | Indonesia
:: Tepas Sajarah Garut  Kajadian


Cimarémé

Di pasisian Garut, aya jalan anu kawilang  panjang, ngembat ti mimiti Banyuresmi nepi ka Leuwi Goong. Éta jalan téh dingaranan R. Hasan Arif. Hasan Arif téh salah saurang tokoh perjuangan anu mingpin pemberontakan patani di Cimarémé, Garut, taun 1919. Éta tokoh katelah oge ku jenengan Haji Hasan.

Ku naon Haji Hasan baruntak?
Lalakonna panjang, harita, pamarentah Kolonial Walanda keur nandangan susah lantaran teu bisa ngimpor béas balukar Perang Dunya I. Keur ngungkulan éta masalah, pamaréntah Walanda netepkeun dua aturan. Kahiji maréntahkeun sangkan kebon tiwu dirobah jadi sawah. Kadua, ngawajibkeun patani sangkan ngajual sawaréh tina hasil tatanénna ka pamaréntah.

Dina netepkeun harga jeung nangtukeun sabaraha lobana hasil tatanén anu kudu dijual, pamaréntah Walanda dianggap sawenang-wenang. Di Cimarémé upamana, anu harita kabawah ka Kawadanaan Lélés, masarakat kudu ngajual paré opat pikul per bau, kalawan harga anu murah pisan. leu aturan téh kacida ngabeungbeuratan patani.Nya lantaran ayana éta aturan, Haji Hasan jeung anak buahna sapuk ngabangkang ka pamaréntah Kolonial Walanda anu. dianggap geus sawenang-wenang.

Tanggal 7 Juli 1919, ka Cimarémé datang serdadu jeung pulisi Walanda anu diparéntah pikeun néwak Haji Hasan. Haji Hasan jeung anak buahna ngalawan. Antukna Haji Hasan di drel (ditembak) nepi ka maotna.

Buntutna panjang. Tindakan pamaréntah Walanda téh ngondang réaksi ti masarakat bumiputra. Inohong inohong bumiputra jeung sawatara urang Walanda anggota Volksratid (mun ayeuna mah DPR) masualkeun éta peristiwa anu sakuduna mah teu perlu kajadian saupama pamaréntah henteu nétepkeun aturan anu matak ngabeungbeuratan.

Tapi pamaréntah Walanda keukeuh kana pamadeganana yén Haji Hasan téh geus ngabangkang sarta kudu dibérésan. Malah pamaréntah Walanda nyalénggorkeun pasualan ka nu lain-lain. Di antarana ku cara nuding Sarekat Islam (SI) kalibet kana éta kajadian. Sawatara urang tokoh SI dituding jadi provokator anu nyababkeun Haji Hasan baruntak ka Walanda. Méh kabéh tokoh SI di Garut ditéwak sarta dibui. Sawaréh mah aya nu dibuang ka Sawahlunto sagala.

Sabada éta kajadian, kekecapan "Haji Hasan didrél Kumpeni" jeung "Kadé bisi kadéngé ku cakcak bodas (mata-mata)" jadi kacapangan. Kiwari Désa Cimarémé téh kabawah ka Kacamatan Ba-nyuresmi, Garut, sarta makam Haji Hasan dipusti-pusti pisan ku masarakat di dinya.

 

Pencét panah kiwa/katuhu dina Kibord sangkan pindah ka artikel séjén
Navigasi
March 2017
SuMoTuWeThFrSa
   1234
67891011
131415161718
19202122232425
262728293031 
Stats Situs
IP Address : 54.167.135.61
Tautan Pilihan
spacer