placeholder for flash movie
Jumaah, 18 April 2014   English | Indonesia
:: Tepas Has Wewengkon Jajanan


Pindang Ecot

Biasana anu dipindang téh lauk. Tapi naha ieu mah bet Écot ?

Singhoréng éta mah ngan ukur ngaran, da angger anu dipindangna mah lauk. Ari laukna, lauk emas. Kiwari pindang Écot kajojo ka mamana. Réa réstoran jeung warung sangu anu maké tradematk pindang Ecot.
Nya ti mana asalna pindang Ecot téh? Singhoréng ti Cidatar, Kacamatan Cisurupan, Garut. Ti dinya pindang Ecot nyebar, di antarana ka Tasik, Sumedang, Bandung, Purwakarta, jeung Cianjur. Tuluy ka luar Jawa, di antarana ka Bali jeung Pontianak. Malah kiwari pindang Ecot geus aya nu diékspor ka mancanagara.
Sajarahna mah dimimitian taun 1947, sabada Agrési Militér Walanda. Pa Hadi, urang Cidatar nu jadi pagawé Walanda, harita diajak gawé bareng ku urang Walanda keur usaha nyieun pindang. Pa Hadi téh salakina Ma Ecot anu harita muka warung sangu di Patrol, Cidatar. Laukna jeung bahanna mah ti Cidatar, tapi resepna maké resep urang Walanda. Waktu aya reuni urang Walanda, di antara susuguhna téh pindang jieunan Pa Hadi jeung Ma Ecot téa.
Di sagédéngeun éta, pindang Pa Hadi téh ngajual ogé di warung pamajikanana. Tétéla payu pisan, lantaran pindang Ma Ecot mah béda jeung pindang-pindang séjén, da resepna gé apan ti Walanda.
Naon atuh kaistiméwaan pindang Ecot téh?

Saenyana, pindang Ecot téh teu jauh béda jeung pindang séjénna. Bahanna lauk, samarana ukur gula, konéng, uyah, jeung jahé. Anu ngabédakeunana téh cara ngolah jeung nyieunna. Ngasakanana merlukeun waktu 12 jam, nepi ka samarana nyerep. Pindang séjén mah apan ukur I – 2 jam sarta sok dicampur ku bahan kimia. Akibatna sok babari haseum. Ari pindang Ecot mah rék disimpen nepi ka tujuh podé ogé moal babari basi.
Mun ayeuna loba warung maké trademark pindang Ecot, éta téh jasa rundayan Ma Ecot anu nyebarkeun tradisi pindang Ecot ka tempat séjén. Ngan cenah anu enya-enya asli rundayan Ma Ecot mah sok maké ngaran "Pusaka Pindang Ecot". Ku usahana anak incu Ma Ecot, kiwari pindang Ecot aya nu diékspor ka Taiwan, Korea, jeung Brunei. Béjana, Sultan Brunei ogé sedepeun pisan kana pindang Ecot mah.


 

 

Pencét panah kiwa/katuhu dina Kibord sangkan pindah ka artikel séjén
Navigasi
April 2014
SuMoTuWeThFrSa
  12345
6789101112
13141516171819
20212223242526
27282930   
Stats Situs
IP Address : 54.205.242.179
Tautan Pilihan
spacer